ENGGANG DEKET ETEK
Asa lot mo arnia sukut-sukuten terenget Enggang dekkat Etek. Enggang en mergerar Enggang suberang laut songket ni mende mo kunukin tempa ni Enggang idi. Masa mo kunukin ari leggo kahar,muas mo kunukin Enggang en itulus Enggang en mo kunukin lae Nturge mahan enumenna malot ia kenan asa itulus momi baruren enggo karina mpera kersik bakin malot i jariri lae asa mer pikir mo kunukin Enggang idi. akum lae Nturge kutulus dekket lae kedek malot nenge aku kinan ibakin enggo narih ndekah kahar idi nggo karina marsak lae kedek-kedek. i sadenakin lae mbelgah idi mo kutongkir. akum idi malot sendah marsak idi bagidimo pemikiren Enggang idi asa lakomo kunukin Enggang idi menongkir lae mbelgah kin. idi pe idapet enggo marsak asa iekut-ekut mo kunukin baruren lae idi dapet Enggang idi mo lae lot sada saruam i lubuk lubuk asa ienum mo katena lae idi.menter mongkam Etek serpu i lae idi nari. ale Enggang ulang ncio kukap bagimo kata Etek serpu idi. asa mengaloi mo Enggang idi. Biarna kono ku idah ale Etek. Konomo lebeken kupangan asa ku enum lae en bagimo idokken Enggang idi. nai mongkam nola mo Etek idi. Kade mo dosangku ale Enggang asa i panngan kono aku nimu bagidimo idokken Etek idi. asa mongkam mo Enggang idi. olong-olong pe enggo mbue kupangan buah kayu pe enggo mo mbue kupangan ale Etek mada ngo i bakin lot dosana asa kupangan titikna kin muda lot nidah panganen ni pangan. enpe ale Etek biarna kono enggo kuidah kupangan mo kono asa dua kali pokokna kuakap janah malum muasku menum lae janah palum cubellekku bagidimo idokken Enggang idi.
Asa merpikir mo kunukin Etek idi.Nggo mo kuidah gondem i julu mbelgah mo nahan lae en memaroh lae mbelggah idi kubakin lebeken kelilin Enggang en asa leleten ia ulang i pangan aku ukum enggo roh nahan lae mbelggah idi menter nahan aku langi arap laus arap dike aku jumpasa bagidi mo kunukin i pikiren Etek idi. Asa mongkam mo Etek idi. Muda malot terdokken nimu ale Enggang sekali i pangan kono aku kudembban kono lebeken giam lot engetenmu sorangku mendemban kono idi bagimo kata ni Etek idi. Asa mengaloi mo Enggang idi. Akum sora mendemban aku idi ale Etek jadi ngo bahan asa ku dengkohken soramu idi tah mende ma i dengkoh penggelku bahan mo ndor endemu aku idi bagi mo kata Enggang idi. Asa i bahan Etek idi mo katena kunukin mengendei Enggang idi.
Enggang kok, Enggang kok, dagingmu Enggang kok bage nakan kineppel ( kupul) Enggang kok, Takalmu Enggang kok bage buah neur i pulo nari Enggang kok, Paruhmu Enggang kok bage buluh si Taraya Enggang kok, kerahongmu Enggang kok bage pulo mergantung Enggang kok, kabengmu Enggang kok bage kipas raya Enggang kok, Pinukurenmu Enggang kok bage perbuah Tekkis Enggang kok, Pagutmu Enggang kok bage pejabat kelling Enggang kok, Buk bukmu Enggang kok bage Pati pati Raya Enggang kok, Bilalangmu Enggang kok Bage batu persegi Enggang kok, Pusuh pusuhmu Enggang ko bage jantung galuh si Tabar Enggang kok, Ate ate mu Enggang kok bage batu mercundut Enggang kok, Bitukamu Enggang kok bage batu tugunna i lae Enggang kok, Tenten mu Enggang kok bage pelangkah Gading Enggang kok, Gurnang-gurnang mu Enggang kok bage Ragin rembaru Enggang kok, Ekurmu Enggang kok bage kipas ni raja Enggang kok, Pahamu Enggang kok bage tebu tonggal Enggang kok, Buku teunmu enggang kok bage buku Sanggar menguda Enggang kok, Nehemu Enggang kok bage Gaer gaer Enggang kok, jari jarimu Enggang kok bage bunga si lima lima Enggang kok, Seselumu Enggang kok bage lundu Tenggar Enggang kok, Matamu Enggang kok bage saga tonggal Enggang kok, Babahmu Enggang kok bage babah batu merdauk Enggang kok, Soramu Enggang kok bage perkas mencalit Enggang kok bagidimo kunukin kata ni Etek idi mengendei Enggang idi.
Kessa bagidi asa mongkam mo Enggang idi nggo mo aku i endei kono ale Etek pande ma ngo kono kepeken menggeari sendihi idi kupangan mo kono bagidimo kata Enggang idi
Asa mongkam nola mo Etek idi mike nola lausku ale Enggang nahan aku asa pangan, ku endei kono situk nari asa pangan aku bagidi mo i dokken Etek idi. Muda i endei kono deng ngo nimu aku ale Etek asa kupangan kono bahanmo asa ndor kono kupangan bagidi mo idokken Enggang idi. Asa iolihi Etek idi mo i endei Enggang idi. ketika Etek mengendei Enggang idi kunukin menter roh lae mbelen menter langi Etek laus mi liang. mbiar Enggang manun ibakin lae mbelgah idi menter ngkabang mi darat. Kessa soh Enggang mi darat asa menter mo ia Mengolcipi , ia ale enggo mo aku dapet Jerla Etek idi mema roh ngo kepeken lae mbelgah asa ndorok meluah ia katena asa i endei aku ndai. Kessa roh lae mbelgah idi menter ngo ia laus Tertenggek tenggek ngo aku en. ia leh dok Enggang idi. Kessa bagidi kunukin I dokken Enggang idi menter mo ngkabang Enggang tertuktuk takal Enggang idi i dahan kayu menter kumeciong ndabuh menter mate Enggang idi. Bagidi mo pate sukut sukuten Enggang deket Etek.
*Sengkut mengabir duru ncuak dahan kempaba,
senteng mo kata ni sukuten menumpak tuhan debata
*Mbages urat ni jering mabbo urat parira,
Mbages mo enggo berngin meddem mo kita karina
Tidak ada komentar:
Posting Komentar