Persiroen Si SINGKAM Deket Si BARBAREN

   Lot mo sada arnia sukut sukuten ale kaltu mergerar si Singkam turangna mergerar Si Doriangin. Lot ma mo si jae kuta mergerar si barbaren lot turangna sada mergerar Si Renciten. Nai lot ma mo si jae kuta mergerar si Raja Bunga-bunga songket ni jengkar mo tempanan. Merunjuk mo si Raja Bunga-bunga i buat mo turang ni si Singkam si mergerar Si Doriangan. Kessa bagidi ibuat nola turang ni si barbaren si mergerar si Renciten jadi tinokorna peduaken. Enggo kessa bagi i embah mo duana daberru idi mi kuta janah ibaning mo Perkeba keba Perbekasen daberruna idi. Kessa lot setahun i pertinokor si Raja Bunga-bunga nai berat daging mo jelma idi meraduna. Jumpa mo itahuna deket i ketikana asa rebbak i ketaring mo tokor emasna idi duana janah daholi mo dukakna duana todes tempana, todes Belgahna, todes sorana tangis, todes maholina nai merpikkir mo si Raja Bunga bunga, dua kubuat perukatku meraduna menter rebak tubuhen anak ku buat mo roroh (jukut) asa rebbak ku baba mi lae anakku idi bagidi mo dok pikirenna asa i dokken mo naposona tuberas deket merikani( Mengusahaken beras deket ikan tah jukut) lako roroh. Kessa lot roroh dekket beras asa i aleng mo kula-kulana i mo turang ni tinokorna idi. Kessa sama roh turang ni si Doriangain dekket turang ni si beru Renciten asa i buat si Raja Bunga bunga mo kerbo sada i pertasak naposona daholi kerbo idi i dokken mo merdakani naposona daberru. Kessa ntasak jukut deket nakan asa i petupa mo sada permanganen sintterem sada permanganen nasa kula-kulana sada ma permanganen ia nasa sukut. Kessa cibal karina panganen asa mertenggo mo ia bai nasa si ni kutana idi.

   Kessa karina roh merpulung mi bagesna idi asa msndok rana mo si Raja Bunga bunga. Merpulung  mo kene karina nasa sintterem i urung tengah idi tan perlak en mo karina nasa Puangku, kene nasa sininangku roh mo ke karina mi terruh ngeanku en isen mo kita merpulung mangan bagimo dok si Raja Bunga bunga.

   Ue dok si nasa berena panganen idi asa merpellin mo nasa sinterrem tuhu merpellin nasa kula kulana merpellin nasa ia sebeltek kessa bagidi asa i bakin si Raja Bunga bunga jukut kerbo idi sada pinggan bI si Barbaren. Kessa bagi asa mangan mo i karina. Dung kessa manganasa marapurun asa i sahutken mo kata nakan idi mendahiken sintterem, i sahutken karina dengan kutana idi. Nai mongkam mo si Singkam idi ale silih enggo mo kami bessur karina nasa si ni tenggomu en bessur meroroh gerar si ni panganta idi kade ngo bagahken kene mo asa kubettoh kami nagidi dok si Sungkam.

   Ue ale silih akum ni dok ndene idi tuhu ngidi. Asa kubuat pe nakan en dekket jukut sipangan merkiteken beberre ndene nggo tubuh. Bagimo dok Raja Bunga bunga. 

Muda merkerohen pinupusku idi mo kita nemu ale silih berre oles mo dekket pemere en bagimo do si Singkam.

Dalan ukum silih malot teralo mada menektek menir gia lot ngo ku bakin ale silih bagimo do si Raja Bunga bunga.

   Asa i bereken mo oles tersarambar bai si Singkam deket Barbaren. Kessa i jalo kula-kula idi oles idi asa mengerana mo si Barbaren. Eggo mo kami meroles i bakin kene ale silih gerar beberre nami idi mo bahan kene bagimo Dok si Barbaren. Ue silih dok si Raja Bunga bunga. Asa i bahan mo gerar anak baru tubuh idi. Sada mo mer gerar si Tanggal sada nai Mergerar si Bubu. Kessa i bagahken si Raja Bunga bunga gerar anakna tubuh idi asa samah molih mo sinterem mersitongkir bekasna. Kessa bagidi asa i bahan si Raja Bunga bunga peranggunen anakna idi dua i anggunken si berru Doriangin mo anakna i angunken si berru Renciten mo anakna nai medem mo ia meraduna. Kessa samah i anggunken anakna idi mahar mo ari. Ndekah mi ndekahna i sada wari terang kessa wari keke mo ia meraduna si berru Doriangin menter laus mi lae. Tading mo i rumah si berru Renciten.

   I tengen si berru Renciten mo anakna mi anggunen enggo mate, i tengen mo anak si Doriangin ngelluh nai nturah mo ukurna lako menggancihken ( i sambari). Janah menter mo i sambarken si Berru Renciten anakna si enggo mate idi mo i anggunen si berru Doriangain i buat mo anak si enggeluh i pesusu si berru Renciten. Roh mo si berru Doriangain i lae nai i tengngen mo anakna asa i pesusu katena nggo i dapet mate, meneter mo ia tangis menderpa derpa oda kade lot si mbernit ni anakku en kalake nggo mate kudapet aku molih i lae idi nari. Otang en anakku si enggeluh idi ngo anakku i sambarken kono ngo ndai sendah idi aku mi lae idi asa kudok anakku katemu si mate en, na ale beru dukakmu mate en niang dukakku idi asa kupesusu bagimo dok si berru Doriangin. Asa mongkam mo si berru Renciten. Otang anakku si mate idi ale bae dike tandana anakmu dike tandana anakku asa i dokken kono anakku si mate idi bagimo do berru Si Renciten mengalo kata berru Doriangin idi menter i pecibal si berru Doriangin i ruang tengah bagas si mate idi. Kerna malot merkedungen barang dukak ise si mate idi asa menter mersialeng kula-kula daberru meraduna. Nai samah roh mo si Singkam deket si Barbaren, kessa soh asa i kuso si Singkam mo kinimate ni beberrena idi. I bagahken si berru Doriangin mo kessa mahar ari ale tuang (Turang) kutadingken mo i rumah en lako mi lae mongkar ngo kubege, roh kessa aku i lae nari enggo ku dapet mate i anggunen idi  sada si Berru Rnciten ngo kessa i bages simbelgah bagimo kata si Doriangin bai turangna idi. Muda bagidi ngo kata mdene ale otang pinupus ni si Barbaren ngo si mate idi i sambari si Berru Renciten ngo tuhu pinupisku idi. Pengido kene beberengku idi bagidimo kata ni si Singkam. Asa mongkam mo si Barbaren, ndigan kin pe ale bae kecemalen mo bagidi katemu bakin mate idi beberremu idi menter i teddo kono pinupusku idi i telahi deba mo kita asa jadi bagimo kata si Barbaren. Kumerna oda merkedungen terpaksa mo i pesoh mi sintua ladang, asa menter mo mersibere perjukutna bai sintua ladang, asa i tellahi mo malot terpatensa, nai menter mo mer sidudur cincinna si Singkam deket Si Barbaren asa i Per-pengului sintua ladang, bagipe malot pate asa i bakin pengulu id mo seksi Graha Si Singkam deket Si Barbaren idi asa mongkam mo Raja Bunga bunga. Aku ale sibahan kata kata malot aku ngeut mergeraha meraloken kula kula ku idi apai mo ku tumpak apai mo ku argan maku kom kom si enggeluh en mo ku petahan tahan kerna dukak si kutubuhken asa mergeraha kula kulangku idi ale si bahan kata asa mernidah-nidah mo aku idi si menang sidas pinupus si talu otang sidasa pinupus bagimo kata raja Bunga bunga.

   Ue ale silih sikedeken mo kono kubakin kami si bahan kata en kula kula mu idi kesa pe -alo alo (meralo) bagidi mo dok pengulu idi asa postepi si bahan kata idi mo Graha si Singkam dekket si Barbaren asa mersitengamen mo ia menter mo mersibedilen genep ari mersidarak-darak mo ia kacimbang belahna asa mur-mur mo i beritaken Raja keruaren nari deket anak bayo merpenghulu i graha idi. Asa i tongkir mo lebeken si Singkam. Kami ale silih asa roh pe kami mi kuta ndene en menongkirken Graha ndene en ngo kami asa kusiahi kami perkatan ndene deket Si Barbaren. Bagimo kata penghulu idi. Asa mongkam mo si Singkam. Muda menongkir  Graha nami en ngo kene nimu ale silih jadi midi bagimo kata si Singkam. Asa idokken mo naposona mertasak panganen. 

Kessa ntasak panganen asa i taruhi naposona mo mi bale panganen idi asa i hantari mo. Kessa i hantari asa mangan mo pengulu idi. Kessa salpun mangan asa marapuruni nai i sahutken mo panganen idi dekket i sahutken mo barangpe peterangken permulaen Grah deket si Barbaren. 

   Kessa i bettoh si bahan kata idi asa mer medemen mo ia. Mahar ari si berembenkenna asa ibuat si Singkam mo sada jukut i pertasak. Ntasak kessa nakan deket jukut idi asa iberemo mangan si bahan kata idi. Mongkam mo si bahan kata idi. sukutenmu enggo ibagahken ko ale silih permungkahen perguluten ndene deket Si Barbaren, ker Si Tanggal deket Si Bubu todes tempana, sada mate sada ngelluh mer sitedo tedon kene pinupus ndene idi. Ku pedempak mo kene asa murah ukumenku. Bagimo dok penghulu idi. Ue ale silih dok si Singkam mengaloi. 

   Nai laus mo sibahan kata idi mikuta si Barbaren. Kessa soh ia mongkam mo sibahan kata idi. Asa roh pe aku ale silih menongkir graha ndene en ngo kami asa kuukumi kami bagimo nina si bahan kata idi. 

   Asa mongkam mo si Barbaren. Muda menongkir graha nami en mo kene asa roh nimu ale silih. Jadi bilang ni panganen ngo malot dapet aku malot jumpaku mersampang mo atengku asa cibal alat nami en. Na cincinku en asa telahimo kami mende mende agidimo kata si Barbaren.

   Ue dok si bahan kata idi asa i dokken si Barbaren mo si melgang panganen. Enggo kessa ntasak panganen asa i taruhi mo mi bale i cibali asa mangan mo si bahan kata idi. Kessa salpun mangan asa marapuren janah i sahutken mo magahken pemungkahen graha idi. Nai mongkam mo pengulu idi. Enggo mo kubege kata ndene meraduna kupe dempak mo kene i kuta si Raja Bunga bunga asa murah kukap dabuhenken ukum, malot ne pejae jae kene bagimo dok si bahan kata idi. Ue ale silih ngeut ngo aku pedempak ulang so penter ukum i bakin kono si bahan kata bagimo dok Si Barbaren. Ue silih penter ngo ukumku. Malot aku ngeut merukum merbalik-balik, penentengen ngo ukumku bagimo dok sibahan kata idi. Asa ialengngi naposo sibahan kata idi mo Si Singakam. Lako mo ia karinan mi kuta si Raja Bunga bunga. Nggo kessa merpulung karina asa mendok rana mo pengulu idi. Enggo kessa mo pulung i senda deket si dasa dukak bagimo deket sidasa pinupus meraduna mer sisukutken sinabulna mo kene asa kubege kami dok si bahan kata idi. Nai mongkam mo si Raja Bunga bunga.

   Aku silih si kepaten, si danggelku ngo ku persidanggelken meraduna ngo kelleng atengku midah anankku tapi muda enggo nangis ate ni begu nggeluh anakku idi asa sidanggelenku ku persidanggelken. Kalak silih ngo kessa mergulut aku kom kom ngo bagimo dok si Raja Bunga bunga mendokken bai si bahan kata idi. 

   Mengerana nola mo si Singkam. Akupe ale si bahan kata asa ku alo pe si Barbaren bakin i sambari si berru ketansa ngo pinupusku bagimo dok si Singkam.

   Mendok rana nola mo si Barbaren asa ku alo pe silih si Singkam bakin i teddo pinupusku bakin mate pinupusna bai turangna si ketansa nari idi mo karinana asa mer graha kami bagidimo dok Si Barbaren. Nai mengerana mo sibahan kata idi. Enggo mo kubegeken sukuten ndene meraduna merpikir mo lebe aku si dari en bagimo nina si bahan kata idi. Asa ibakin pengulu idi makinken anak-anak i bagesen dingerrang(ganderang) merboni boni mo pengulu idi makinken anak-anak idi asa i tutupi mo dinderang idi. Nai mongkam mo si bahan kata idi bai si berru Doriangin dekket bai berru Renciten. En ale tuang (turang) embah kene mi babo delleng adena, kessa kene soh mi babo delleng adena jagati kene mo nahan dinggerang en lako mo kene sada klak lebbeken kesaa rohpe si sada kalak idi asa laus ma si sada kalak nai bagidi mo kata pengulu i nai laus mo berru Doriangain. I jujungmo inang dinggerang idi i embah gaul gaul dua asa soh mo ia mi penangkengen nai mongkam mo si berru Doriangin. Ia ale begu kugongken ledjja bagen tah malot ngo i bereken deba ankku idi bangku molih bagidi mo dok si Berru Doriangin.

   I tebahi si bahan kata idi mo si berru Renciten asa ulang mentadi sampe soh mi babo deleng adena. Kessa soh kene nahan palu kene nola nahan dinderrang en, alaten ndene nggo soh bagimo dok pengulu idi. Ue dok si berru Renciten lako mo ia. Kessa soh ia mi penagkenngen mongkam mo ia. Ale begu kugongken pe lejja bagen tah molih ngo nahan anak ni deba bai inagna lejja sambing aku pesusuken deket menangkeng deleng en tah i enget sidasa dukak ngo dukakna i perpatoh bagimo kata si berru Renciten tikanna ia menagkeng idi. Nai kessa soh ia mi babo deleng idi ass i jangatina mo dinggerang idi asa molih ia mirumah. Nggo kessa soh ia mi rumah asa i pecibal mo dinggerang idi asa i. Osari si bahan kata idi mo terik(tali) dingerrang Idi nai i peruar mo anak-anak idi i bagasen dinggerang idi nari dekket i kusoi mo.

   Enggo mo kono i jujung daberu si dua en bagahken mo kata si perpodi merjujung kono barang katerakin katana. Ulang alang alangen magahken bangku bagidi mo kata si bahan kata idi. Asa i bagahken anak-anak idi mo kunukin kata si perpodi merjujung aku idi ale raja nami. Kelsohen ia kubege. Ia le begu kugongken lejja bagen Tah molih ngo anak ni deba lejja sambing aku mengeluhi, lejjana sambing aku mer jujung dinggerang en menagken deleng en bagi kata kubege ale raja nami. 

   Nai kata si perlebe si me Merjujung aku idi ale raja nami kessa soh ia mi penagkengen idi. Kekelsohen ia ku bege. Ia le begu kugongken mo lejja bagen tah malot molih ngo anakku idi i bahan si bahan kata idi mo si perlebe merjujung aku idi ale raja nami bagimo kata anak-anak idi magahken kata daberru si duak kalak idi. 

   Nai mongkam mo si bahan kata idi . Nggo kubettoh dabuhenku ukum nggo magahken bana si so mada si dasa dukakkin en mo anak si ni bagesen dinggerang eb mendengkoh katana. Molih mo bai si berru Doriangin anakna si Tanggal anak si berru Renciten mo si mate idi. Teraku aku ngo si beru Renciten anakna ngo keppe si mate idi i gancihken ananakna mate idi mi anggunen anak ni kaltuna bakin todes idi ngo tempana anakna idi asa i sambari ananakna idi enteng i bettoh berru si Doriangin ngo keppeken ngo sanga mergulut kula kukana idi.

   En pe ale Singkam beberemu ngo singgeluh idi bebere si Barbaren ngo si mate idi ulang ne mo kene merubati ulang nenge mo kene mer graha. Nggo molih anak perubaten ndene idi, anak persiroen ndene idi bai si dasa dukakkin. Pate mo patemo perkataen ndene en samah molih mo kita karina bagimo kata pengulu idi. Ue dok si Barbaren dket si Singkam. Bagimo kunukin kepaten ni sukut sukuten si Singkam dekket si Barbaren ale kaltu sini sukutken siperlebe tah lot kurang sada kurang dua malot kubettoh sini bagahken na i deba bangku. Bagidi mo sohna.

Njahjuah